救殭清道夫

好耐無寫文,亦都好耐未睇港產片,今次 救殭清道夫 可以當係一次稍為破格嘅小品,唔係特別長嘅片,同埋卡士看似唔係好頂尖。 首先我想講,片名都仍然符合主旨,但睇完就可能會另有想法,例如覺得應該叫「我的殭屍女友」。

個故仔最基本就係講,食環署有個叫特別行動組嘅分組,專門對付一直存在嘅殭屍。但個組嘅英文名竟然叫Vampire Cleanup Department,可能係唔想同現實中嘅政府架構太過巧合?香港政府嘅 Department,不論人數,最少都會有頗為高級嘅人員助陣,不過既然係秘密編制,咁應該叫咩名都可以嘅⋯⋯

然後,如果你望下本片嘅圖片同活動相片,就會知,無錯,就係有個似乎幾靚嘅殭屍,而且係女主角嚟。個故事再講落去就會係劇透。我睇到一半,已經不禁自問:究竟係唔係講戀屍癖?

呀,其實都唔係嘅,後面嘅感情線稍為救返個主線,令人對感情線稍為有些少同情同埋理解,男主角一直堅持殭屍有壞亦都有好嘅。

本片好嘅地方有兩個。

一,大膽用新人。我無乜睇過新人嘅戲,Babyjohn 蔡瀚億 真係人如其名,好後生,佢嘅角色亦都好成功咁令呢個特別行動組有返啲朝氣。 倘若有續集,可能講下新晉「處理殭屍主任」點樣保育「好殭屍」甚至「殭屍文化建築」等等。 相信都有極多觀眾覺得有 林明禎 嘅戲就一定要睇。而我都認為,你中意佢嘅話,入場睇佢一個已經值回票價。 林其實無對白可言,但無論造型定係舉止都幾注目。 如果你一直只能留意佢,會發覺套戲不如改叫「我的殭屍女友」,最少我就覺得係咁。至於 林明禎 本人,雖然無對白,但係我覺得佢表現得比男主角更加成熟同冷靜,可能真係無對白好過有,因為只會更加「搶戲」,即使已經係女主角都咁話。

二,有老戲骨支撐主線,就係 錢小豪、吳耀漢、邵音音,其次係 趙學而 同 羅莽。錢小豪應該好耐無上過啲咩戲,今次係展現身手嘅極佳機會,動作十分利落。 其實我更加注意嘅係 姜師傅 (袁祥仁)。其實佢係極資深演員,喺本片真係極之似傳聞中嘅茅山師傅。袁其實就係飾演過《武狀元蘇乞兒》嘅洪七公傳人,向蘇燦傳授功夫個位乞兒。用老戲骨襯托 Babyjohn 係相當好嘅處理。

本片處理難度在於,點樣講故事之餘,又帶出條感情線。資深演員基本上同條感情線係無交集,尤其因為女主角根本無對白,所以主線同感情線其實會有時間上嘅衝突,講得主線又唔太講到感情線,講太多愛情又會使故事唔夠連貫。本來故事主線,即係打殭屍,已經係好簡單嘅故仔,又無乜辦公室政治。於是本片講多咗愛情,就會顯得主線失色,老戲骨嘅作用就會受制。

我諗比起以上衝突,較大問題係 Babyjohn 處理感情戲好似比較幼嫩,一開頭我就覺得男主角戀屍。當我諗多咗,但之後佢又好似表達唔到對女友嘅愛情之深。最後嘅高潮場面中,男主角係要帶出呢種反應,但我可以理解新人非常難做到呢一點。以前睇過個別香港一線歌手嘅感情戲,去到緊湊情節都係做唔到呢一點。再者,由於有林明禎嘅畫面(對於個別男觀眾)已經非常搶鏡,只可以講男主角稍為普通少少已經會被鏡頭無視,但係男主角嘅角色本身就係做政府工嘅新人,唔用新晉演員又十分犯駁。

我對本片總結係,老鬼維持大局,新人慢慢成長同坐正,而後生女殭屍搶鏡搶鏡搶鏡。

觀後感:

1) 我睇咗「我的殭屍女友」,或者「林明禎福利」。其實佢以可愛形象出場已經係「福利」。

2) 趙學而嚴重唔夠戲,我完全睇唔到佢個角色嘅由來。

3) 而家上網想避免「被劇透」係好難嘅事,睇戲之餘切勿上網睇留言。

4) 可以整返套前傳,嗯,我想睇林明禎擔正嘅前傳,我要「福利」呀!

5) 我以為片後有彩蛋,其實有啲地方根本未詳細講過。

睇下林明禎點講:

睇下羅莽師傅點講殭屍產地(竟然無劇透!):