一個傻女的故事 (1)

一個傻女的故事 (1)

想寫一個創作故事, 時間返返去2010年, 個年係好特別嘅一年, 係關於一個年青女仔嘅經歷. 點解想寫呢個故事呢? 可能因為我幾鍾意思考, 響思考嘅過程, 寫低一啲嘢, 會令到我思路更加清晰。


個女仔叫阿欣, 一個普通到唔普通嘅名字。 嗰一年佢 20零歲, 讀完大學之後去咗北歐生活。無他嘅, 因為佢家人就係住北歐, 一個安寧, 與世無爭, 同埋千篇一律嘅地方。
呢個女仔憑著自己嘅努力, 入咗一間世界級嘅大銀行, 佢用四個月時間摸熟咗成個系統, 開始研究一啲新嘅program。每一日返工, 佢都唔會覺得特別開心,或者興奮, 只係一種返工嘅感覺。 佢唔係討厭佢嗰份工作 , 但係亦都唔係特別喜歡。 返工,只係為咗生存。
就係咁樣過咗兩年, 兩年之後佢開始諗佢嘅生活,
係唔係要一直咁樣過呢? 除咗賺取到人工?
人工其實係代表錢, 錢係要用響有意義嘅地方上。
阿欣諗,咁不如返返去亞洲睇下呢個世界? 反正佢又係響亞洲出世, 應該好快融合呢個社會。
不出所料, 佢好快返香港就搵到一份工作, 都係從事金融企業。 開頭嘅時候,佢傻呼呼, 每日朝頭早見到人就開開心心大聲叫人早晨。 後嚟發覺,原來香港嘅文化唔係咁樣嘅。 耐咗之後,佢開始變得沉默, 同埋好多事都先放喺心諗得好清楚先至再講。
中環嘅燈光好靚, 特別係夜晚黑高速飛行嘅電車。 每一晚佢就著住高踭鞋, 夜晚嘅時候行落辦公室,好似遊客咁樣望住五光十色嘅香港。 燈光好靚, 不過日復一日之後,佢開始有啲孤單, 因為最重要嘅家人唔響身邊。
阿欣並冇出人頭地嘅情意結, 亦都唔係太著重金錢, 覺得夠食夠使就可以。 平時唔大使, 最鍾意食嘅就係大家樂嘅一哥焗豬扒飯。
因為呢個女仔向歐洲長大, 唔係好識得亞洲嘅人情世故, 仲有唔太識得掩飾自己嘅面部表情同情緒, 經常都搞出笑話。不過好彩佢做嘅公司係鬼佬公司, 裏面有中國人,但係佢最主要接觸嘅都係外國人。
佢諗: 不如搵一個自己喜歡嘅對象,咁就冇咁孤單? 但係基於阿欣有一個優哉游哉嘅性格, 經常天跌落嚟當被冚, 所以佢都冇主動去搵乜嘢對象, 甚至錯過好多姻緣,因為忽略咗追求者嘅暗示,令人以為被拒絕。 其實佢只係木訥,同收唔到信息。
阿欣有積極返教會, 同返以前認識嘅弟兄姊妹聯絡,大家都好關心佢。
就係咁樣響投資銀行裏面做咗兩年, 好平淡嘅心情。 原本做得好好地, 唔使走, 不過一件突然嘅事,令佢覺得唔適宜自己一個留響香港, 就係佢畀人搵咗笨。

 

有一次佢去咗一個event, 識左個男仔, 個男仔第一次見佢已經大獻殷勤, 讚佢靚、好、純。 宜家阿欣諗返,其實係話緊佢鈍。
呢個29歲嘅男人追咗佢大概一個月, 阿欣覺得可以試下同呢個人發展, 因為呢個人好識得觸摸佢嘅心理, 總係令到佢笑。 基於呢個女孩子唔係好叻睇人, 佢就帶咗個男人畀身邊嘅女性朋友認識, 身邊有三個女仔同時間一齊見佢。 就響阿欣行開去洗手間返嚟之後, 佢三個朋友不約而同話: 你男朋友頭先flirt 我哋.
阿欣聽完呆咗一下, 諗: 唔係呀嘛? 係唔係一個誤會呀? 相信佢應該唔會咁做嘅。
嗰日食完飯之後, 阿欣一個人返咗屋企, 佢叫個男人唔使送佢。 佢想攞多啲時間去觀察嗰個男人, 因為覺得有古怪。
有一日個男人突然間去咗佢屋企附近打電話畀佢, 話有嘢拎畀佢, 咁個女仔就落咗去附近嘅7-11見佢。 男人話急住要用洗手間,想借用。
阿欣問: 你可唔可以去附近嘅洗手間? 個男人話: 唔可以, 因為佢急到就快瀨。
阿欣一時同情佢, 畀咗佢借洗手間。 不過阿欣唔肯入屋, 開左門,畀咗佢入屋之後,喺屋外面等佢。 因為覺得始終男女共處一室唔係太好,阿欣獨居。
個男人用完洗手間之後,講咗句唔該, 之後走咗。

 

後來阿欣發覺佢唔見咗一部貴重嘅相機, 嗰部相機原本一直擺喺枱上面, 但係唔見咗。 佢覺得好奇怪,周圍搵, 但係都搵唔返。 嗰一刻佢大概知道, 佢部相機係畀呢個男人偷咗,放左入袋。 阿欣打電話去質問對方, 對方話冇咁嘅事。
其實呢件事帶畀個女仔嘅打擊唔係唔見咗一部幾千蚊嘅相機, 而係對對方嘅信任,同人性嘅幻滅。 好在嗰陣時候佢哋仲未開始一齊。
個女仔一時覺得心灰意冷, 就打電話返去老家, 問佢家人可唔可以移民返去香港stay for good陪佢。 佢家人當然話唔可以, 因為佢家人都有工作做。
就係咁樣,個女仔就辭咗職, 執咗包袱走咗返北歐。
之後佢遇上唔同嘅人, 同埋唔同嘅事。如果有讀者有興趣,我會可能寫下一章。

 

連詩雅-好好過

還要生活 別再三失眠
如常熱情工作 應該慶祝衷心許個願
年紀太少 人人受過傷無可避免
明日我便能振作 成熟半點