麥麥加推 Signature Collection 包

工作繁忙,但不忘即刻試麥當勞易手後推出嘅新包款,我稱之為「 signature 包」,好似叫得幾親切咁。三個包款,連續三日試哂,就同大家講兩句啦。

首先係喺 Pi day 品嚐好耐無食過嘅 香芋批 ,一如以往都係甜甜哋,芋頭有少少香,淡淡哋,主要靠糖搭夠。然後呢⋯⋯

號稱130克嘅 安格斯牛肉 做餡嘅 芝味蘑菇安格斯 。感覺上係以前 瑞士芝味 (都係M記出品)更佳,用咗唔同嘅包,芝士同牛肉落更多料。其實M記而家做法就係將原本(易手前)已經有嘅custom burger「發大」嚟做,改成全線供應,唔只係得幾間旗艦會賣好包。雖說有個別客覺得無咗幾個招牌包款好可惜,但新三款其實只係變相加咗幾蚊,但質素我覺得平均進步咗。

為求科學求真,我第二日試下一款,就係 清新田園烤雞 ,果然係淡味多菜嘅款式,雞係一大堆「文火」煎嘅雞扒,有菜有蕃茄,圓圈包面中間加上 牛油果 蓉。齋包就未算,但味道已經比其他包清淡得多。順便加杯 青蘋果梳打茶 ,又真係有少少蘋果味,都係飽肚嘅一餐。

跟手就梗係試埋第三款辣辣包啦,就係叫 狂惹火辣脆雞 。都係雞肉,但唔同第二款,係「 Buttermilk 脆雞 」,雞肉厚啲但係相對較細塊,配菠蘿、墨西哥風味辣茄醬及 墨西哥小辣椒 (Jalapeño)。驚喜嘅係,原來可以揀辣嘅程度!於是就隨便要咗中辣,一食之下,「幾感動」,呵呵。呢個時候件菠蘿就發揮作用,平衡返辣味。當然啦,乾身嘅包點辣都係有限,最緊要係感受到小辣椒嘅香就得。食辣最緊要香,我覺得。

好喇,我今次嘅 judgment 係,最好食依然係牛肉加芝士嘅 芝味蘑菇安格斯 。啲牛肉係咪有130克,我就唔太在意,總之比以往任何一款包都大塊肉,同埋啲白芝士幾入味,就好肯定。

我睇餸食飯,一分錢一分貨好公道。倘若要更為 higher tier 嘅口味,去各大商場嘅漢堡店,幾廿蚊實有更靚嘅料,但首先你就要路過至得。返工好忙嘅話,平平地快餐之選食簡單包款,絕對係OK㗎。

今次M記,我覺得純粹係發展出一條稍為中價嘅路線,咁就可以區分慣常廉價、中價、custom made嘅中高價,同其他(非連鎖)餐廳嘅高價漢堡。多個market表示顧客多一批選擇,絕對係好事。聽落動筆之際, 芝味蘑菇安格斯 好似唔係好夠貨,證明好受歡迎喇。